Bizkaiak ekinBarriren aldeko apustua egiten du enpresa gizatiarragoak eta lehiakorragoak eraikitzeko

ekinBarri, CEBEK, FVEM, CECOBI, ASCOBI-BIEBA eta AVEQ-KIMIKA elkarteek sustatutako proiektua, Bizkaiko lidergo eraldatzailearen ardatz bihurtu da berriro Alhóndiga Bilbon egin den urteko ekitaldian. Jardunaldian, Ainara Basurko, Bizkaiko Foru Aldundiko Ekonomia Sustapeneko diputatuak, pertsonak lehiakortasunaren erdigunean kokatzeko garrantzia azpimarratu zuen.

“ekinBarrik aurrera jarraitzen du enpresen balio eraldatzailea pertsonengan dagoela aldarrikatuz eta tesi hau emaitzen bidez frogatuz”, adierazi zuen Basurkok irekiera hitzaldian.

Erronka konplexuen testuingurua

Enpresa-testuingurua gero eta konplexuagoa da, bereziki profil kualifikatuen eskasia eta aldaketa teknologiko eta energetiko azkarrak direla eta. Diputatuaren iritsiz, “gaur egungo egoerak estrategia berriak garatzera behartzen ditu Bizkaiko enpresa asko, eta horretarako, ezinbestekoa da epe luzera begiratzea. Mundu gero eta aldakorrago eta teknologikoago honetan, faktore humanoa da benetako aldea egiten duen elementua”.

Aldaketa motorea

Bere hitzaldian, Basurkok erakundeetan lidergo mota berri baten beharra esan zuen: “Lidergo eraldatzailea behar dugu, enpresaren misioa pertsonen helburu pertsonalekin konektatzen duena. Pertsonak zerbait handiago baten parte direla sentitzen dutenean, beren konpromisoa eta produktibitatea biderkatu egiten dira”.

ekinBarrik jada lidergo eraldatzailearen filosofiari jarraitu nahi dioten enpresa asko biltzen ditu. “Urtero gero eta enpresa gehiago zaudete ekinBarrin. Eta hori guztia, ekinBarriko taldeak enpresa bakoitzaren errealitatera ondoen egokitzen diren tresnak eta metodologiak garatzeko egiten duen lanari esker”, aitortu zuen diputatuak.

Horrez gain, Bizkaiko Foru Aldundiaren ekimenarekiko konpromisoa berretsi zuen: “Aldundian urteak daramatzagu ekinBarriren aldeko apustua egiten, CEBEK, FVEM, CECOBI, ASCOBI-BIEBA eta AVEQ-KIMIKA elkarteek lideratzen eta kudeatzen duten programa. Zergatik? Gure helburu nagusia Bizkaiko enpresen lehiakortasuna delako, eta lehiakortasun hori berrikuntza eta etengabeko eraldaketatik dator”.

Bizkairako proiektu giltzarria

Diputatuak ekinBarriren garrantziari buruzko hainbat ardatz azpimarratu zituen: “ekinBarrik taldearen hazkunde pertsonala eta profesionala sustatzen ditu, enpresetan humanismo eta enpatia gehiago txertatuz. Gainera, berrikuntza, sormena eta aldaketara egokitzeko gaitasuna sustatzen ditu beti. Bere funtsean, benetakotasuna eta koherentzia ditu, lankideen ahalduntzea bultzatuz”. Horri dagokionez, Basurkok Julian Trullén nazioarteko coach-a aipatu zuen, zeinak dioen talde konprometitu batek produktibitatea ! arte handitu dezakeela.

Foru Aldundiak, halaber, ekinBarrirekin osagarriak diren beste ekintza batzuk babesten jarraituko du, hala nola, 5 eta 100 langile arteko enpresei zuzendutako laguntza-programak edo talentu STEM erakartzeko eta fidelizatzeko estrategia publiko-pribatua, “Bizkaia with the Talent”. Programa hauek guztiek, Basurkok adierazi zuenez, talentuaren aldeko “borroka” gainditzen laguntzen dute, non belaunaldi gazteek helburu eta malgutasun handiagoak eskatzen dituzten.

Etorkizunerako apustua

Basurkok konfiantzaz eta anbizioz amaitu zuen: “Lidergo eraldatzailea ez da moda bat. Enpresa erresilienteagoak, berritzaileagoak eta arrakastatsuagoak eraikitzeko giltzarria da”. Enpresei ekinBarriren sarean parte hartzera animatu zien, proiektuak lehiakortasuna indartzen ez ezik, “gizarte kohesionatu eta bidezkoagoa” ere sustatzen duelako.

Bizkaiko Foru Aldundiak, Basurkok ziurtatu zuenez, lidergo eraldatzailea sustatzen duten ekimenak babesten jarraituko du, pertsonak estrategia enpresarialaren erdigunean kokatuz. “Enpresa gizatiarragoak enpresa indartsuagoak ere badira”, ondorioztatu zuen.