Gatazkak kudeatzea eta ordezkaritza ematea, Agaleusen bilakaeraren gakoak
Agaleus enpresak, hondakin arriskutsu eta ez-arriskutsuen kudeaketan espezializatua, aldaketa sakona izan du bere lidergo- eta antolaketa-ereduan ekinBarri metodologia ezarri ondoren. Eraldaketa horri esker, gardentasuna, arduren ordezkatzea eta taldearen parte-hartzea hobetu dituzte erabaki estrategikoetan.
DEIA egunkarian egindako elkarrizketan, Ángela Fernández zuzendari nagusiak azaldu du ekinBarri ezarri aurretik erabakiak estrategiako batzordean soilik hartzen zirela. "Orain, batzorde taktikoa ere osatu dugu, eta bertan 20 pertsona baino gehiago ari dira parte hartzen egoeraren analisia eta ekintza-planerako proposamenak egiten". Erabaki honek zuzenean eragin du taldearen parte-hartzean eta motibazioan. "Horretarako, enpresa garden bat izatea beharrezkoa da", azpimarratu du.
Aurrerapauso garrantzitsuenetako bat izan da gatazken kudeaketa hobetzea, edozein erakundetan funtsezko alderdia. "Erakunde guztietan estresa eta tensioa dago. ekinBarrik gatazkak beste modu batean lantzeko gakoak eman dizkigu, lasaiago eta ordenatuago ibiltzeko", azaldu du Fernándezek. Metodologiak komunikazio eraginkorragoa sustatu du taldeetan, tirabirak murriztuz eta lankidetza-giro hobea sortuz.
Agaleusen esperientziak erakusten du ikuspegi egokia izanda, eraginkortasuna handitu daitekeela kontrola galdu gabe. "Antolatzen eta ulertzen lagundu digu, ordezkatzea ezinbestekoa dela", nabarmendu du zuzendariak. Aldaketa honek zuzendaritzari ez ezik, taldeei ere mesede egin die, parte-hartzea areagotuz eta eguneroko jardueran inplikazio handiagoa sustatuz. Azkenik, Fernándezek berriro azpimarratu du arrakastaren giltzarria parte-hartzea izan dela: "Gatazkak gutxitzen laguntzen badu, taldearen ikuspegia hobetzen badu eta pertsonek konektatuago sentitzen laguntzen badu, zergatik ez horren aldeko apustua egin?".